مقالات عامة

الزوجة الثانية

بقلم :أسماء عبد المنعم كمال الصعيدي

#الزوجة_الثانية

في الحقيقة انا كنت وقفت كتابة مقالات من فترة بس قررت اني ارجع اكتب المقال ده باللغة العامية وبطريقة سريعة لأهمية الموضوع
كان في بوست واحد كتبه بصراحة استفزني بطريقة مبالغ فيها مقدرتش امسك نفسي واكتب اللي انا بكتبه ده ..
البوست بيقول فيما معناه
إن مش من حق الزوجة ترفض لزوجها زوجة ثانية وبيعتبر ان ده تعدي حدود منها وان الزواج المتعدد مش عقاب ولا تكدير ليها ابداً مش بس كده بيقول ان مش من حقها تبقى زوجة اولى اساساً لو موافقتش بده ?
ومفيش اي مشاكل عنده لو الزوجة حصل ليها ضيق او غيره ده حقها برده !?
اولاً كده عشان نبقى متفقين انا مش هدفي من كتابة المقال ده اي نوع من الاعتراض عــلے شرع ربنا او ان مضايقة مثلا !
احب اقول اني أُكن للشخص ده كامل الاحترام والحرية في التعبير عن الرأي ولكن استوقفتني كتير طريقة تفكيره العجيبة والمختلفة دي!

اولاً اللي يقول الكلام ده يبقى نموذج يحتذى بيه ويكون بيكلم من واقع تجربته الشخصية الناجحة مش واحد اساساً معدي الثلاثين ولسه متجوزش وبيطالب اي بنوتة يتقدملها انها توافق على مبدأ الزوجة الثانية والثالثة و… ولو رفضت يبقى بتتعدى على حدوده زي بالضبط اللي بيطلب انه يحصل على درجة الماجيستير قبل أساساً ما يدخل الثانوية العامة ويمتحن ويشوف الدنيا فيها ايه وإيه الظروف اللي هتحصله وقتها .
إنما بنوتة والدها ووالدتها تعبو فيها كل أنواع التعب الي تتخيلها تطلع من بيت بباها معززة مكرمة تتجوز واحد عارفة انه مبدأه أياً كان ايه اللي يحصل في الدنيا لازم يعددّ
تفتكر مين في الدنيا هتوافق عليك الا يعني اذا كانت البنت دي في حاجة مش مضبوطة فيها أو انها هدفها زيه احنا نصلح مجتمعنا ونعف البنات الي كبرت في السن ومتجوزتش والمطلقات والأرامل وكمان نحلّ مشكلة الرجالة الي عنيها زايغة ، كلهم طبعاً احترمهم جداً بس انا بعتبر ده علم الغيب انك تفكر ان حياتك هتبقى وردي بعد الجواز ومفيش اي نوع من المشاكل الصحية والنفسية والمادية والأسرية وانكو بتخلفو وزي الفل واطفالكم عال العال واهلكم وزويكم وانتم لا ينقصكم اي شيء في العالم ماعدا بس انكو تصلحو مجتمعكوا !! الي اساساً مليان بلاوي لا تعد ولا تحصى اهم بكتير من التعدد زي تدني مستوى التعليم والصحة والنزول تحت خط الفقر وان احنا من الدول النامية اللي عندها شتى انواع المشاكل عشان نمسك في مشكلة صغيرة زي التعدد ونسيب المشاكل الاساسية الثانية
والآية القرآنية بتقول “يا أيها الذين آمنو عليكم أنفسكم لا يضركم من ضل اذا اهتديتم ”
يعني انا اشوف نفسي الاول وحياتي واولوياتي بعدين اروح احل مشاكل الناس !! مش العكس
انا بعترض كأنه عارف ومتوقع علم الغيب يعني هيجوز عادي دون اي مشاكل بعدين هيخلف عادي ومتأكد ان ربنا مش كاتبله انه يبقى عقيم ومراته برده هتخلف عادي وهيجلهم طفل سليم ١٠٠٪‏
اقصد انه مفترضش مثلاً انه يحصل ظروف ويطلع مبيخلفش او زوجته مبتخلفش او ابنه مثلا اتجز في الحضانة اما اتولد ، اي ظرف من ده هينسيك اسمك اصلا مش تفكر في الجواز الثاني والثالث !!!
طيب افرض اتجوزت اللي شرطت عليها وعملت حادثة ورجلك اكسرت هتروح تتقدم لثانية كده ولا هتتراجع عن الفكرة طيب نشوفها من اتجاه تاني لو زوجتك حصلها مشكلة وبقت قعيدة هتسيبها كده وتمشي على نفس مبدأك !!
خلاص عندك علم بالمستقبل انه كله تمام تمام
هل توقعت ان والدتك يحصل ليها كده
او توقعت ان اختك او بنوتك يحصل معاها كده من زوجها
امال ازاي وحاسة اني بتكلم عن بوست من عصر الجاهلية ومش معتبرها انها انسانة اساساً ده احنا رجعنا للأَمة أما كانو بيشتروها ويبيعوهاويدفنوها بالحية !!
اي دين واي ملة تخليك تعمل كده
اما حد يجي يطبق شرع ربنا ينفذ شروطه بحذافرها..
مشاكل مجتمع ايه الي تفكر فيها وانت واسرتك بتموتو بالبطيء
مينفعش ابداً اروح اغير الناس وانا نفسي سايبها
الآية بتقول”إن الله لا يغير ما بقوم حتى يغيروا ما بأنفسهم ”
يعني انت متحلمش تغير المجتمع لازم كل واحد يغير من نفسه الأول !
والمهم أوي بقى الي عايزة اقوله ؛ انه لا فكر في مضايقتها واحساسها ولا زعلها
عايزة اديلك مثال صعب بس مش هقدر أقوله هقول حاجة أسهل
ان احساسها هو نفس احساسك اما تعرف انك عقيم وإن زوجتك قررت تخلعك وتروح تتجوز واحد ثاني وانت يتعرف عنك انك مبتخلفش وبالتالي محدش هيرضى يجوزك لبنته ابداً ..
ومين عارف يمكن كما تدين تدان فيعني رفقاً بالقوارير
والغريب بقى اننا عمرنا ما سمعنا أو حتى نادراً اما نسمع ان واحدة سابت جوزها عشان مبيخلفش ده بالعكس جداً ده بتراعيه وبتحترمه وبتخفف عنه وبتنسيه همه وتحسسه انه مش فارق معاها اطفال هي بتعامل انسان بانسانيتها وحبها قبل ما تكون بتعامل راجل
اما اللي منتشر جداً وبغالبية عظمى تلاقي الراجل وأهله اول ما يتجوز ومراته تطلع مبتخلفش يقول علطول ذنبي ايه انا لازم اتجوز فوراً هنقول ايه بس غالبية الزوجات مبيهونش عليهم العشرة !

النقطة الاخيرة ان صاحب البوست بيقول ان التعدد هيحل مشكلة الازواج اللي بتخون زوجاتها وبكده المشكلة هتنتهي بدل ما يخونك ويعمل حرام عشان هو بسلامته عينه زايغة فاديله الحريه انه يتجوز ٢و ٣ عشان ميبصش بره .
طيب انت عندك حق مليون في المية وبتعجبني نيتك السليمة في حل مشاكل المجتمع لكن عندي كذا تساؤل
اساسا الواحد مش قادر يتجوز واحدة بسبب المشاكل المادية و…. الخ
طيب منين عرفت ان ابو عين زايغة ده انه ميقولكش وانا اكلف نفسي ليه مهي سهلة ورخيصة في الحرام واهو في النهاية المجتمع يبررهالي ويقول نزوة وخلصت ! ثاني حاجة ودي الأهم ان في كثير منهم دينياً وأخلاقياً قليل عندهم التربية والدين والأخلاق وما يحبوش يجوزوا كذا واحدة ويصرفوا عليهم والحرام بالنسبة ليهم اسهل وامتع ومش هتعرف تروح تجيب كل واحد فيهم وتربيه من اول وجديد
وفي النهاية يبقى انت فشلت في حل مشاكل المجتمع
والآية بتقول” إنك لا تهدي من أحببت ولكن الله يهدي من يشاء ”
لكن هو يشاء يعني عايز يتوب وربنا يهديه ماشي لكن انت عمرك متعرف تهديه وتغير اللي جوا نفسه ابداً

 

زر الذهاب إلى الأعلى